Erakor Golden Star we naoia oli stap redi blong hostem wan Pool blong 2019 OFC Champions League long Korman Stadium long nekis yia long manis February, oli gat 2 manis nomo i stap blong pripea from bigfala tunamen ya.
Pefomens blong olgeta long Port Vila Football Association Premia Divisen blong 2018/2019 Digicel Jampionship i soem se Vanuatu jampion ya hemi rili struggle yet.
Afta long 4 maj, Vanuatu klab jampion ya i no winim wan maj ya, oli dro 2 mo lusum 2.
Erakor oli kam blong dro wetem Tupuji long 0-0 mo Shepherds United long 1-1.
Oli lus wetem Ifira long 1-0 mo las wiken oli foldaon long wan hevi sko blong 5-0 wetem Tafea FC.
Risal ia i putum olgeta long bottom blong klasmen naoia, we i putum i go long kwesten se sapos Erakor hemi wantem mekem wan gudfala pefomens long Champions League oli mas stat pripea naoia, from risal afta long dei 4 long jampionship i no soem nating se oli stap pripea from bigfala tunamen ya.
Daily Sport i stap lukluk se wetem wei we olgeta samting i stap go naoia, Erakor hemi mas rikrut nomo long olgeta klab insaed long Port Vila Football Association blong strengthenem tim bifo Champions League i stat.
Long wan nara nius blong futbol, olgeta Port Vila Football Association premia maj long wiken bambae i lukim long 11am, Shepherds United i plei Tafea, 1pm, Galaxy i pleiem Ifira mo long 3pm, Tupuji i pleiem BSP Amicale.
