Olgeta Port Vila Football Association premia divisen las wiken i lukim 3 maj i kik off long Port Vila Stadium.
Fes maj blong dei Tafea FC hemi kam blong winim wan strong Shepherds United saed long 3-1.
Tafea nao hemi bin openem sko thru long straeka Leo Moli long fes haf, blong putum sko long haf taem long 1-0 long feva blong Tafea.
Sekon haf i stat, Leo hemi addem sekon poen blong hem, be i lukim Shepherds thru long Ronaldo Wilkins hemi sko daerek long wan kona kik blong putum sko long 2-1.
Taem we Shepherds hemi stap push blong faenem wan ikwalaesa, Alista Kalip hemi makem namba 3 poen blong Tafea long wan kaonta atak.
Sekon maj blong dei, Galaxy FC i kam blong winim Ifira long wan sko blong 2-0.
Kolkipa blong Ifira, Kalo Firiam hemi putum wan own goal eli long fes haf, blong putum sko long haf taem long 1-0 long feva blong Galaxy.
Long sekon haf Henry Namatak hemi addem sekon poen blong Galaxy blong silim win blong klab blong hem ova long Ifira. Las maj blong dei, BSP Amicale hemi muv i kam sekon long klasmen wetem wan 2-1 win ova long Tupuji Imere.
Klamen naoia i lukim:
1, Tafea 15
2. BSP Amicale 9
3. Galaxy 8
4. Ifira Black Bird 6
5. Yatel 2
6. Tupuji Imere 2
7. Shepherds United 2
8. Erakor Golden Star 2
Source: raymond@dailypost.vu
