Port Vila Football Association Digicel Premia Divisen jampionship dei 3 I lukim 3 win mo 1 dro.
Fes maj long Fraede las wik I lukim Tafea FC hemi kam blong winim Tupuji Imere long wan sko blong 4-1.
Tafea hemi openem sko long fes haf mo I lukim afta long end blong fes haf Tafea I dominet bigwan be afta long olgeta plante janis oli gat oli putum sko laen long 2-0.
Sekon haf I stat Tupuji thru long straeka Rodney Serveux hemi hedem in wan fri kik blong putum sko long 2-1.
I no longtaem nomo Tafea I winim wan penalty, be I lukim James Chilia hemi no alawem bol ya blong go insaed net net, blong mekem fes eva penalty save blong hem long premia divisen.
Taem we Tupuji I stap traem blong faenem wan ikwalaesa, Tafea I hitim 2 moa poen blong silim faenol sko, Tafea 4 mo Tupuji 1.
Long olgeta maj Sarere Ifira Black Bird oli kam blong winim wan strong Erakor saed long 1-0.
Tugeta saed oli bin gat janis blong putum moa poen be Ifira nao hemi manej blong konvetem 1 ya.
Sekon maj blong dei, Galaxy hemi no save stoppem Shepherds United blong kam bihaen blong tufala I dro longh faenol wisel long 1-1.
Las maj blong dei, BSP Amicale hemi kam blong winim Yatel long 3-1.
Klasmen hemi no ofisol yet, afta we maj blong Ifira mo Tafea we Ifira hemi winim, PVFA hemi no kambak blong disaedem kes blong tufala yet, from Ifira hemi bin winim be oli yusum 6 substitiut transfea pleia.
