Vanuatu Senia Tim Blong ol Woman i mit wetem senia women’s team blong Papua New Guinea (PNG) long Wednesde lanj taem.
PNG hemi sapos blong kasem Port Vila long Tuesde evening be follem rabis weta long kaontri i mekem se oli mas ovanait long Nadi, Fiji, mo oli jes kasem kaontri long yestede 9 o’klok long moning. Nomata we oli araev leit be oli stil manej blong plei.
PNG i dominetem gem long fes haf wetem wan sko blong 3-0 long feva blong PNG.
Leit long sekon haf oli kam blong silim sko long PNG 4 mo Vanuatu 0. Vanuatu hemi bin dominetem haf ya be oli no save sko.
Daily Sports i gat janis blong save toktok wetem PNG tim koj, Peter Gunemba. “Mifala i tekem gem ia olsem wan fes trial maj blong mifala,mo hemi wan gudfala gem we Vanuatu i givim long team blong mi olsem wan gudfala test,” hem i talem. “Gem ia bambae i helpem mifala blong impruv long ples ia, nomata we mifala i winim gem ia be hemia ino inaf, olgeta gel oli nid blong impruv moa tuwods tunamen blong OFC Womans Nations Cup long New Caledonia nekis wik.”
Long semtaem tu Daily Sports hemi toktok wetem Vanuatu tim hed koj, George Kalo. “Hemia hemi wan intanasonal frenli, mo wetem yumi long Vanuatu,” koj Kalo i talem. “Hemi wan 10-12 dei trening nmo, we hemi very shot.Be long mi, mi tekem olsem fes stating blong preperesen blong yumi long Vanuatu tuwods Samoa 2019 Pacific Games, be olgeta gel blong yumi oli plei gud be blong finishing nomo i nokat from yumi pripea blong 10 dei nomo ,be yumi tokbaut PNG olgeta oli stap mekem priperesen finis blong kam go long OFC Womans nations cup.”
Kalo hemi adem tu se, “Mifala olsem kojing dipatmen we mifala i lukaotem, nasonal tim blong this 11 dei, mifala i pripea nomo blong tekem frenli ya from PNG hemi rikwestem blong go long New Caledonia, mo bambae oli plei maj ya finis olsem preperesen afta go long tunamen. Be nekis step hemi stap wetem VFF ia nao blong talem stret wanem nao hemi nekis step blong yumi tuwods preperesen blong Pacific Games nekis yia.”
PNG Koj, hemi adem tu se bambae tim blong hem bambae hemi stap long Port Vila kasem long Fraedei mo leko Port Vila long medel nait blong go taon long Noumea, New Caledonia. Fes gem blong PNG long OFC Womans Nationas Cup long New Caledonia , bambae oli mitim Samoa long Sande wiken ia.
